۸صبح، کابل: د ډيموکراسۍ او بشري حقونو په اړه د طالبانو د مشر هبتالله اخوندزاده تازه څرګندونو او په عام محضر کې ښځو ته پر سزا ورکولو او سنګسارولو د نوموړي ټينګار ته پراخ غبرګونونه ښودل شوي دي.
فایق یکشنبه د وري پر ۵مه په خپله اېکسپاڼه کې لیکلي چې په تېرو دوو لسیزو کې د طالبانو تر دغه شعار لاندې د دغې ډلې د جنګیالیو په ګډون زرګونه افغانان وژل شوي او هېواد ویجاړ شوی دی.
نوموړي ویلي: «په اسلام کې د خلکو له وینې ګټه اخیستنه د نه منلو او حرامه ده.»
فایق زیاته کړې: «په کومه بېه؟ په تېرو دوو لسیزو کې د دغه شعار لاندې د طالبانو په ګډون زرګونه افغانان وژل شوي، هېواد ویجاړ شوی، میلیونونه کسان کډوالۍ ته اړ شوي او افغانستان یو ژور ناورین ته ټېل وهل شوی دی. دا بسنه نه کوي؟ په اسلام کې د افغانانو له وینې ګټه اخیستنه د نه منلو او حرامه ده.»
د پخواني حکومت د ملي امنیت رییس رحمتالله نبیل هم په خپله اېکسپاڼه کې د هبتالله اخوندزاده څرګندونو ته غبرګون ښودلی دی.
نوموړي زیاته کړې: «افغانان په ځمکه کې د طالبانو د الهي نمایندهګۍ او د هغوی د استبدادي رهبرۍ له ادعاوو څخه ښه خبر دي او افغان ولس د دغې ډلې د افراطي ایډیالوژۍ د بدلون د امکان په اړه هېڅ هیله نه لري.»
د نوموړي په خبره، د ملا هبتالله وروستۍ وینا د طالبانو کورنیو او بهرنیو ملاتړو او لابیګرانو ته یو څرګند پيغام ورکوي چې د ده په ټکو، د بشري حقونو په وړاندې به د دې ډلې بنسټيز دریځونه بدل نه شي.
ورته مهال، د فیسبوک یو شمېر کاروونکو هم په دې تړاو غبرګون ښودلی دی.
د نصرتالله وليزاده په نوم د فیسبوک یو کارن لیکلي: «طالبان د اصلاح وړ نه دي. له لویدیځ یا نورو کسانو سره یې جګړه نه ده؛ بلکې مخامخ یې د افغانستان په نوم هېواد له ښځو سره ده چې پر وړاندې یې لسګونه محدودونکي فرمانونه صادر کړي دي.»
سهراب حفیظي هم لیکلي: «له هر څه مخکې خپله دا کس واجدالقصاص دی. ځکه ډېر بې ګناه انسانان د دغه کس د حکم له مخې شهیدان شوي او په وژنه کې یې مخامخ لاس لري.»
ورته مهال، د احسان ظریفي په نوم د فیسبوک یو بل کاروونکي بیا د طالبانو د مشر له څرګندونو ملاتړ کړی او لیکلي دي: «د الله په حدودو کې هېڅ مسلمان ستونزه نه لري.»
دا په داسې حال کې ده چې د طالبانو مشر ملا هبتالله اخوندزاده یو ځل بیا پر هغه څه چې نوموړی یې «د شرعي حدودو تطبیق» بولي ټینګار کړی او ویلي دي چې له دې وروسته به شریعت په عملي ډول پلی او ښځو ته به په عام محضر کې سزا ورکړي.
نوموړي په خپلو څرګندونو کې ځان د خدای تعالی استازی او لویدیځ یې بیا د «شیطان» استازي بللي دي.
