۸صبح، کابل: له افغان رسنیو د ملاتړ سازمان «نی» چې اوس په جلاوطنۍ کې فعالیت کوي، ویلي چې په افغانستان کې د تېرو پنځو کالو په اوږدو کې د خبریالانو پر ضد د تاوتریخوالي ۷۰۰ پېښې ثبت شوې دي.
نی چهارشنبه د زمري پر ۲۱مه په خپرې کړې خبرپاڼې کې لیکلي چې په دغو پېښو کې ۴۰۰ یې د رسنیزو کارکوونکو او د بیان ازادۍ د مدافع بنسټونو غړو د نیول کېدو او بندي کېدو اړوند دي.
د خبرپاڼې له مخې، په تېرو پنځو کالو کې په افغانستان کې پنځه خبریالان مړه شوي هم دي.
نی زیاته کړې چې د ثبت شوي تاوتریخوالي په ډله کې د خبریالانو او رسنیزو کارکوونکو وهل ټکول او فزیکي تاوتریخوالی هم راځي او په ډېرو مواردو کې بیا طالبان عامل یا اصلي لوری بلل شوی دی.
نوموړي بنسټ ویلي چې طالبانو په تېرو پنځو کالو کې په منځني ډول هر نهه ورځې وروسته دوه خبریالان یا د رسنیو کارکوونکي نیولي او د دغو نیونو موده له څو ساعتونو تر یو کال ډېره وه.
د خبرپاڼې پر بنسټ، خبریالان په ډېرو مواردو کې د طالبانو د استخباراتو له خوا نیول شوي او په کابل کې د ۴۰ ریاست په توقیف خونه یا په ولایتونو کې د استخباراتو په توقیف ځایونو کې ساتل شوي دي.
دغه بنسټ زیاته کړې چې ځينې خبریالان او رسنیز کارکوونکي له څېړنو وروسته بګرام یا د کابل په پلچرخي زندانونو کې هم بندیان شوي دي.
نی ویلي چې دا مهال شاوخوا دوه زره رسنیز کارکوونکي په هغو رسنیو کې فعالیت کوي چې د طالبانو تر مستقیم یا غیرمستقیم مدیریت لاندې دي.
