۸صبح، کابل: د ملګرو ملتونو د بشري مرستو د همغږۍ دفتر (اوچا) اعلان کړی چې په افغانستان کې د ماشومانو د ګوزڼ د تایید شویو پېښو شمېر ۳۶ ته رسېدلی او د دې ناروغۍ د له منځه وړلو هڅې روانې دي.
یاد بنسټ دوشنبه د تلې پر ۲۷مه راپور وکړی چې افغانستان د نړۍ له هغو یوازې دوو هېوادونو دی چې د ماشومانو د ګوزڼ ویروس پکې شته.
د راپور پر بنسټ، د پولیو د ناروغۍ د له منځه وړلو لپاره د بشرپاله بنسټونو په ملاتړ د سپټمبر پر ۲۱مه په ټول هېواد کې د ماشومانو د ګوزڼ واکسیناسیون کمپاین پیل شو.
دغه کمپاین له پنځو کالو کمعمره څه باندې ۱۲.۷ میلیونه ماشومان تر پوښښ لاندې ونیول او موخه یې د ویروس د لېږد د خطر کمول او د دې ناروغۍ پر وړاندې د ماشومانو ساتنه ده.
اوچا ویلي چې د افغانستان په سوېلي او ختیځو سیمو کې د ګوزڼ ډېرې پېښې ثبت شوې دي.
هلمند، کندهار او ننګرهار هغه ولایتونه دي چې د ګوزڼ ډېرې پېښې پکې ثبت شوې دي.
دغه بنسټ د واکسیناسیون د پراخ پوښښ پر ساتلو او د څارنې د سیسټمونو پر پیاوړتیا ټینګار کړی، څو نوې پېښې ژر تشخیص او د ناروغۍ د خپرېدو د مخنیوي لپاره لازم اقدامات ترسره شي.
