۸صبح، کابل: افغان کرېکټ ملي لوبډلې روانې لوبلړۍ په لومړۍ سیالۍ کې سوېلي افریقا ته د شپږو وېکټو په توپیر ماتې ورکړه.
د دواړو لوبډلو ترمنځ دا لوبه چهارشنبه د وږي پر ۲۸مه په شارجه نړیوال کرېکټ لوبغالي کې وشوه.
د لوبې ټاس سوېلي افریقا وګاټه او لومړی یې توپوهنه غوره کړه.
د لوبې په لومړۍ پاڼۍ کې سوېلي افریقا د ویان مولډر ۵۲، بورن فورټوین ۱۶، ټونيډي زورزي ۱۱، کایل ورین ۱۰ او ریضا هېنډرېکز ۹ منډو پر مټ ۱۰۷ منډې هدف وټاکه او ټول لوبغاړي یې وسوځېدل.
په توپ اچونه کې د افغان لوبډلې په ګټه فضلالحق فاروقي ۴، اللهمحمد غضنفر ۳ او راشدخان دوه وېکټې واخیستې.
د ټاکل شوي هدف په ځواب کې افغان ملي اتلانو د خپلو څلور لوبغاړو په زیان د لوبې په ۲۶ اور کې ۱۰۷ منډې پوره کړې او لومړۍ تاریخي بریا یې خپله کړه.
په توپوهنه کې د افغانستان لپاره عظمتالله عمرزي ۲۵، ریاض حسن ۱۶، لوبډلمشر حشمتالله شاهدي ۱۶، رحمتشاه ۸ او ګلبدین نایب ۳۴ ناسوځېدلې منډې جوړې کړې.
دې سره فاروقي په ۷۵ نړیوالو سیالیو کې ۲۳.۶۹ اوسط سره خپلې ۱۰۰ چټکې وېکټې بشپړې کړې او د کرېکټ شپږم افغان لوبغاړی شو چې دا ریکارډ یې په خپل نوم کړ.
د یادونې ده چې د دواړو لوبډلو ترمنځ دویمه لوبه د راتلونکې جمعې پر ورځ وشي.
