۸صبح، کابل: پاکستان اعلان کړی چې له دې وروسته به د افغانستان د ښوونیزو او تحصیلي بنسټونو لهخوا صادر شوي اسناد، د دغه هېواد د لوړو زدهکړو کمېسیون (HEC) لهخوا په رسمیت ونه پېژندل شي.
د پاکستان د فډرال ښوونې او روزنې وزارت پنجشنبه د وږي پر ۵مه ویلي چې د افغانستان تحصیلي اسناد به په پاکستان کې د استخدام یا د دندې لپاره اعتبار ونه لري.
هغوی چې له دې مخکې یې خپلې لوړې زدهکړې په افغانستان کې بشپړې کړې، کولی شي د ازموینې او ارزونې له یوه رسمي بهیر څخه په تېرېدو د اسنادو د معادل سند ترلاسه کولو لپاره غوښتنه وکړي.
د دې پرېکړې له مخې، د دغو کسانو تحصیلي اسناد به وڅېړل شي او معادل سند په ټاکل شویو ازموینو او ارزونو کې له بریالیتوب سره تړلی دی.
پاکستان همداراز د دغه هېواد د لوړو زدهکړو له کمېسیونه غوښتي چې د ازموینې وړاندیز شوی میکانیزم د سپټمبر میاشتې تر نیمایي چمتو او له دغه وزارت سره یې شریک کړي.
د شته تحصیلي اسنادو لپاره د معادل سند د ترلاسه کولو غوښتنلیک وروسته نېټه د ۲۰۲۶ کال د جون میاشت ټاکل شوې او له دې نېټې وروسته په دې اړه نوې غوښتنې نه منل کېږي.
