۸صبح، کابل: د پاکستان د اطلاعاتو وزیر عطاالله تارړ اعلان کړی چې دغه هېواد د طالبانو د یو ورځ مخکې بې پیلوټه الوتکو بریدونو په غبرګون کې د افغانستان په بېلابېلو سیمو کې پر ۱۰ ځایونو هوايي او د بې پیلوټه الوتکو بریدونه کړي دي.
تارړ پنجشنبه د تلې پر ۲مه، پر اېکس پاڼه لیکلي چې پاکستان دغه بریدونه د مشروع دفاع لپاره د خپل حاکمیت د حق د کارولو په موخه ترسره کړي دي.
هغه زیاته کړې او ادعا یې کړې چې دغه بریدونه «قصدي، دقیق، حسابشوي او متناسب» وو او یوازې پر هغو پېژندل شویو پوځي اهدافو محدود وو چې په مستقیم ډول پر پاکستان د برید له هڅو سره تړاو لري.
دغه پاکستاني چارواکي په خپله خاوره کې د طالبانو د تېرې ورځې د ډرون بریدونو په اړه ویلي چې دا د پاکستان د حاکمیت او ځمکنۍ بشپړتیا ښکاره نقض دی.
د پاکستان د اطلاعاتو او نشراتو وزیر طالبانو ته د پاکستان پر خاوره د بریدونو په اړه خبرداری ورکړی او ویلي یې دي چې پاکستان له افغانستانه ترسره کېدونکي بریدونه «نه مني او نه یې زغمي.»
دا په داسې حال کې ده چې دوه ورځې مخکې هم پاکستاني جنګي الوتکو د پکتیا او کونړ ولایتونو پر ځینو سیمو هوایي بریدونه کړي وو.
