۸صبح، کابل: د طالبانو تر کنټرول لاندې رسنیو د راپورونو له مخې، پاکستان نن سهار د کندهار او خوست ولایتونو پر ځینو برخو هوایي بریدونه کړي دي.
د طالبانو د خوست د والي ویاند مستغفر ګربز ویلي چې دغه بریدونه پنجشنبه د تلې پر ۲مه، شاوخوا ۳:۳۰ بجې شوي دي.
د هغه په وینا، د ګربزو ولسوالۍ ګلان کمپ، د خوست ښار مرکز ته څېرمه سیمې او د اسماعیلخېلو او مندوزیو ولسوالیو ځینې برخې په هوايي بریدونو کې په نښه شوې دي.
د دې راپور پر بنسټ، په کندهار ولایت کې د کندهار ښار د نهمې ناحیې پر یوه دښته هم هوایي برید شوی دی.
د طالبانو په وینا، په دغه برید کې «هېڅ ډول» زیان نه دی اوښتی.
د پاکستان د اطلاعاتو وزیر عطاالله تارړ ویلي چې دغه هېواد پر پاکستان د طالبانو د تېرې ورځې د بې پیلوټه الوتکو د بریدونو د غچ اخیستنې په موخه د افغانستان په بېلابېلو سیمو کې پر ۱۰ ځایونو هوايي او د بې پیلوټه الوتکو بریدونه کړي دي.
