8صبح، کابل: پر خوست او ننګرهار ولایتونو د پاکستان له هوايي بریدونو وروسته، سرچینې وايي چې طالبانو په خوست کې د دې پېښې د رسنیز پوښښ اجازه نه ده ورکړې.
سرچینو پنجشنبه د وږي پر ۶مه ویلي چې د پاکستان بې پیلوټه الوتکې تېره شپه د سپېرې ولسوالۍ پر «سورکاخ لاهوري» کلی د څو ساعتونو لپاره ګزمې کړې دي.
د سرچینو د معلوماتو له مخې، په دغو بریدونو کې ځینې کورونه ویجاړ شوي او خلک وېرېدلي دي.
په دغو بریدونو کې په خوست کې درې ماشومان وژل شوي او یوه ښځه او دوه سړي ټپیان شوي دي.
د راپورونو له مخې، وژل شوي ماشومان د «حاجي نعیم خان» بچیان وو.
له دې سره هممهاله، یوې بې پیلوټه الوتکې د ننګرهار د شینوارو ولسوالۍ په «۲۴ ویالې» سیمه کې یو کور په نښه کړی دی.
د طالبانو په وینا، په دغه برید کې د ښځو او ماشومانوپه ګډون څلور کسان ټپیان شوي دي.
سرچینو زیاته کړه چې الوتکې له ګزمې وروسته بېرته پاکستان ته ستنې شوې دي.
د پاکستان پوځ تر اوسه دا بریدونه نه تایید کړي او نه یې هم رد کړي دي.
دا په داسې حال کې ده چې تېر کال د پاکستان پوځي ځواکونو د پاکستاني طالبانو د له منځه وړلو په موخه پر پکتیا، پکتیکا او خوست ولایتونو ورته بریدونه کړي وو.
