۸صبح، کابل: د طالبانو بهرنیو چارو وزارت د پاکستاني پوځيانو له لوري د خوست او پکتیکا پر ځينو سیمو د بریدونو په غبرګون کې په کابل کې د پاکستان سفیر احضار کړی دی.
دغه وزارت دوشنبه د کب پر ۲۸مه په یوې خپره کړې خبرپاڼه کې ویلي چې خپل احتجاجلیک یې په کابل کې د پاکستان سفیر عبیدالرحمان نظاماني ته سپارلی دی.
نوموړي وزارت پر خوست او پکتیکا د پاکستان هوايي بریدونه غندلي او د پاکستان حکومت ته یې یادونه کړې چې «په خپله خاوره تېری په هېڅ ډول نه شي زغملی.»
په خبرپاڼه کې راغلي: «[طالبان] د نړۍ د زبرځواکونو پر خلاف د ازادۍ د اوږدې مبارزې تجربه لري او په خپله خاوره تېری په هېڅ ډول نه شي زغملی.»
پاکستان ادعا کړې چې دا بریدونه یې د پاکستاني طالبانو د غورځنګ یوه قوماندان عبدالله شاه پر استوګنځي کړي دي؛ خو نوموړي قوماندان دا ادعا په یو ویډيويي پیغام کې رد کړې ده.
د راپورونو په حواله، پاکستاني پوځ ویلي چې د افغانستان په ځينو سیمو کې یې د پاکستاني طالبانو غورځنګ مرکزونه د درېیو الوتکو په واسطه چې له ۱۲ څخه زیات لیزر لارښود بمونو یې لېږدول، په نښه کړي دي.
