۸صبح، کابل: د پاکستان بهرنیو چارو وزارت ویلي چې کرښې ته څېرمه د افغانستان په خاوره کې دننه یې د اطلاعاتو پر بنسټ «د اورپکۍ ضد عملیات» ترسره کړي دي.
نوموړي وزارت په یوې خپره کړې خبرپاڼه کې ویلي چې دا عملیات یې دوشنبه د کب پر ۲۸مه سهار مهال کړي دي.
د خبرپاڼې په حواله، د دغو عملیاتو موخه د حافظ ګل بهادر پورې اړوند جنګیالي و چې له ټيټيپي سره په ګډه د پاکستان په دننه کې د څو بریدونو مسوول دی.
دغه وزارت زیاته کړې چې اسلاماباد په تېرو دوو کالو کې په وار وار په افغانستان کې دننه د ټيټيپي په ګډون د «اورپکو ډلو» حضور په تړاو له طالبانو سره خپلې اندېښنې شریکې کړې دي.
په خبرپاڼه کې راغلي: «پاکستان د افغانستان ځمکنۍ بشپړتیا او حاکمیت ته ډېر ارزښت ورکوي. له همدې کبله، د اورپکۍ ګواښ سره د مقابلې لپاره یې تل خبرو اترو او همکارۍ ته لومړیتوب ورکړی دی.»
د پاکستان بهرنیو چارو وزارت ټيټيپي د سیمې امنیت او سولې لپاره «ټولییز ګواښ» بللی دی.
دا په داسې حال کې ده چې د طالبانو بهرنیو چارو وزارت د پاکستاني پوځيانو له لوري د خوست او پکتیکا پر ځينو سیمو د بریدونو په غبرګون کې په کابل کې د پاکستان سفیر عبیدالرحمان نظاماني احضار کړی دی.
نوموړي وزارت پر خوست او پکتیکا د پاکستان هوايي بریدونه غندلي او د پاکستان حکومت ته یې یادونه کړې چې «په خپله خاوره تېری په هېڅ ډول نه شي زغملی.»
د راپورونو په حواله، پاکستاني پوځ ویلي چې د افغانستان په ځينو سیمو کې یې د پاکستاني طالبانو غورځنګ مرکزونه د درېیو الوتکو په واسطه چې له ۱۲ څخه زیات لیزر لارښود بمونو یې لېږدول، په نښه کړي دي.
