کونړ کې د اسعد اباد سره د غازي اباد او ناړۍ لاره له تېرو نېدې شلو ورځو راهیسې طالبانو تړلې، چې د سرک منځ ته يې د غره نه غتې ډبرې را غورځولې دي.
چارواکي وايي، طالبانو د ډبرو غورځولو سره سره، د لارې په اوږدو کې ماينونه هم ايښي دي، چې د ولسي خلکو تګ راتګ يې ستونزمن کړی دی.
د ناړۍ ولسوال حاجي ګل زمان له ۸صبح سره په مرکه کې وویل، چې د ناړۍ لاره د غازي اباد په سیمه کې لا هم تړې، چې له امله يې دې ولسوالۍ ته د خوراکي توکو لېږد هم نه دی شوی.
هغه وايي، ځیني خوراکي توکي حتی پېدا کېږي هم نه او ځیني بیا ډېر کم شوي، چې د خلکو اندېښنې يې را پورته کړي دي.
ولسوال وویل: «له بده مرغه لاره اوس هم بنده ده، خو زمونږ د ځواکونو هڅه روانه ده چې لاره خلاصه کړي، هو د خوراکي توکو کمښت شته، داسې هم دي چې ځیني خوراکي مواد بیخي اوس نشته او هغه چې شته هغه هم د خلاصېدو په حال کې دي، دې چارې په نرخونو اغېز کړی، پخوا که يو څه که په لس ؤ نو اوس شل او دېرش افغانۍ باندې دی.»
د ناړۍ ولسوالۍ ځوانان وايي، که ژر تر ژره لاره خلاصه نه شي، نو خلک به د خوراکي توکو له لوی ناورين سره مخ شي.
احمد رشاد د ناړۍ یو تن اوسېدونکی دی، هغه ۸صبح ته وويل، چې لاره تړلې او خوراکي توکې هېڅ ولسوالۍ ته نه دي لېږدول شوي.
رشاد وايي، له خلکو سره حکومت تر اوسه د هوا له لارې هم د خوراکي توکو مرسته نه ده کړې.
هغه وویل: «خلک ټول مرستې ته اړتیا لري، لاره که خلاصه نه شي دا به ډېره سخته شي، ځکه له دې لارې د نورستان کامدېش او برګمټال ته هم خوراکي توکي ځي، هغه خلک به هم له لوی جنجال سره مخ شي.»
کونړ کې د دې لارې تړل کېدو له امله ګڼ شمېر خلک په لارو کې بند پاتې دي او خېمې يې وهلي دي، تر څو لاره خلاصه او خپلو کورنو ته لاړ شي.
دغه بند پاتې خلک وايي، تر اوسه ورسره هېڅ حکومتي مرسته نه ده شوې او خپله يې خېمې وهلې دي.
په ولسي جرګه کې د کونړ د خلکو استازي جاوید ساپي ۸صبح سره خبرو کې اندېښنه څرګنده کړه، چې د لارو بندېدو خلک له ګڼ شمېر ستونزو سره مخ کړي دي.
جاوید ساپی وايي، د لارې تړل کېدو له مله نه یوازې د کونړ د غازي اباد او ناړۍ ولسوالیو خلک د خوراکي توکو کمښت سره مخ کړي، بلکې د نورستان د کامدېش او برګمټال ولسونه يې هم له بهران سره مخ کړي.
ساپي ۸صبح ته وویل:«زمونږ غوښتنه هم له دولت نه او هم له هغه چا نه چې دا لاره يې تړلې دا ده چې باید ژر تر ژره يې بېرته خلاصه کړي ځکه ټول زیان يې ولسونو ته دی، هلته وړه قیمته شوي، هېڅ خوراکي توکي نه پېدا کېږي، دا ظلم دی او زیاتی دی، حکومت دې هم نرمښت وښيي او مخالفان دې هم په ولس باندې لوبې نه کوي.»
په ورته وخت کې د کونړ والي اقبال سعید وايي، د لارې خلاصون په موخه عملیات روان دي او هڅه کوي ژر تر ژره يې د ولسونو پر مخ پرانیزي.
اقبال سعید ۸صبح ته په استولي غږیز پیغام کې د ولسونو ستونزې تائید کړي او په وینا يې چې دی يې په لټه کې دی.
د کونړ ـ ناړۍ لارې خلاصون په موخه له ډېرو ورځو راهیسې امنيتي ځواکونه په عملیاتو بوخت دي، خو لا تر اوسه نه دي توانېدلي، چې لاره خلاصه کړي.
د کونړ امنیه قوماندان جنرال محمد یوسف مظلوم یار خپله د لارې خلاصون په موخه سیمې ته تللی او عملیات رهبري کوي، تر څو لاره خلاصه کړي.
قوماندان په خپله فېسبوک پاڼه طالبان مخاطب کړي او لیکلي يې دي:«د پاکستان مزدوران که هر څو هڅه وکړي ولس ته ستونزې را ولاړې کړي، خو د ولسونو ساتندویان سرښندونکي ځواکونه به يې پر وړاندې لکه ډال ودرېږي.»
دا په داسې حال کې ده، چې د ناړۍ لاره له ډېرې مودې راهیسې تړل شوي او خلک يې دواړو غاړو ته بند پاتي دي، ځکه د تګ راتګ بله بدیله لاره نه لري.
د کونړـ ناړۍ لاره د اسمار او غازي اباد ولسوالیو په خوا تېرېږي، چې یوې خوا ته يې غر او بل لورې ته يې کونړ سیند دی.
