۸صبح، کابل: «له پولیو پاک افغانستان» بنسټ وايي چې د خطرناکو ناروغیو پر وړاندې د ماشومانو د بشپړ خوندیتوب لپاره څو واکسینونه اړین دي او د ماشومانو روغتیا یوازې په واکسین نه ډاډمنېږي.
نوموړي بنسټ چهارشنبه د زمري پر ۱۴مه په اېکس کې لیکلي چې د چټکو څو واکسینونو (MAAC) کمپاین په لړ کې ماشومانو ته څو بېلابېل واکسینونه ورکول کېږي څو د مخنیوي وړ ناروغیو پر وړاندې خوندي شي.
«له پولیو پاک افغانستان» بنسټ ټينګار کړی چې واکسینونه د جدي ناروغیو د کمښت په برخه کې مهمه ونډه لري.
دغه بنسټ د «یو ماشوم، څو واکسینونه، بشپړ خوندیتوب» شعار ارزښت ته په اشارې، له خطرناکو ناروغیو د ماشومانو پر خوندیتوب ټينګار کړی دی.
نوموړي بنسټ په وار وار پر وخت ماشومانو ته د واکسینونو تطبیق اړین بللی دی.
