۸صبح، کابل: له پولیو پاک افغانستان بنسټ د پولیو (د ماشومانو د ګوزڼ) ناروغۍ پر وړاندې د ماشومانو د لا ډېر خوندیتوب لپاره د واکسین د اضافي دوزونو پر اهمیت ټینګار کړی دی.
دغه بنسټ دوشنبه د لړم پر ۱۸مه، ویلي چې په منظم ډول د ماشومانو واکسینول د هغوی د بدن دفاعي سیستم پیاوړی کوي او د ټولنې په ساتنه کې مرسته کوي.
دا په داسې حال کې ده چې افغانستان لا هم د نړۍ له هغو دوو هېوادونو دی چې د ماشومانو د ګوزڼ وحشي ویروس پکې له منځه نه دی تللی.
د ماشومانو ګوزڼ یوه ویروسي او ساري ناروغي ده چې تر ډېره له پنځو کلونو کمعمره ماشومان پرې اخته کېږي او د دایمي فلج او ان مړینې لامل کېدای شي.
په منظم ډول واکسینول د دغې ناروغۍ د مخنیوي او د ویروس د خپرېدو د مهارولو له مهمو لارو دي.
