د ایران وسلهوالو ځواکونو د امریکا ځواکونو ته خبرداری ورکړی چې که هرمز تنګي ته د ننوتلو هڅه وکړي، نو برید به پرې وکړي.
د ایران وسلهوالو ځواکونو دوشنبه د مې پر ۴مه، له هر مز تنګي د بند پاتې بېړیو د لارښوونې لپاره د سمندري ماموریت د پیلولو په تړاو د امریکا د ولسمشر ډونالډ ټرمپ اعلان ته په غبرګون کې یوه اعلامیه خپره کړې ده.
په دې اعلامیه کې راغلي چې د دې سمندري لارې امنیت د ایران په واک کې دی او ټینګار شوی چې هر ډول خوندي تګراتګ باید په هر حالت کې د وسلهوالو ځواکونو په همغږۍ سره ترسره شي.
اعلامیه زیاتوي: «موږ به د هرمز تنګي امنیت په بشپړ توان وساتو او مدیریت به یې کړو، او ټولو سوداګریزو او د نفتو لېږدوونکو بېړیو ته خبرداری ورکوو چې په هرمز تنګي کې له مېشتو ځواکونو سره له همغږۍ پرته له هر ډول تګراتګه ډډه وکړي، څو د هغو امنیت له خطر سره مخ نه شي.»
ټرمپ ویلي چې امریکا هڅه کوي څو د منځني ختیځ پر وخت د دوشنبې له سهاره د نړۍ د بېلابېلو هېوادونو بېړۍ او عمله په خوندي ډول د هرمز له تنګي ووځي.
