۸صبح، کونړ: په کونړ کې ځايي سرچینې وايي چې په دغه ولایت کې یو ځوان د ناپېژاندو کسانو له خوا وژل شوی دی.
سرچینو شنبه د تلې پر ۲۵مه، له ۸صبح ورځپاڼې سره په خبرو کې وويل چې دغه ځوان پرون د کونړ د اسمار ولسوالۍ په «شنګر» سیمه کې په چاقو وهل شوی او وژل شوی دی.
د دغه ځوان د وژنې لامل او انګېزه لا هم نه ده څرګنده شوې.
ویل کېږي چې په وروستیو ورځو کې د هېواد په ګڼو ولایتونو کې جنايي پېښې، هدفي وژنې او وسلهوالې غلاوې زیاتې شوې دي.
دا په داسې حال کې ده چې په تېرو ۲۴ ساعتونو کې د هېواد په بېلابېلو سیمو کې د لږ تر لږه پنځو کسانو د وژل کېدو راپورونه خپاره شوي دي.
