د روسیې دفاع وزارت ادعا کړې چې ځواکونو یې د اوکرایین په ختیځ کې دوه نورې سیمې هم لاندې کړې دي.
راشا توډې چهارشنبه د اکتوبر پر ۱۶مه د روسیې دفاع وزارت د بیان په حواله راپور ورکړی چې د دغه هېواد پوځیانو د لوهانسک ښار «نوسکویه» او په دونیڅک کې «کراسنيیار» ښارګوټي نیولي دي.
د ادعا له مخې، په تېرو ۲۴ ساعتونو کې له روسي ځواکونو سره په نښتو کې لږ تر لږه یو زر او ۸۲۰ اوکراییني سرتیري وژل شوي دي.
تر اوسه اوکراییني چارواکو په دې اړه رسمي څه ویلي نه دي.
څو ورځې وړاندې هم روسیې ویلي و چې د دغه هېواد ځواکونو له څه باندې دوو کالو سختو جګړو وروسته د اوکرایین په ختیځ کې مهم ښار «ووهلهدار» لاندې کړی دی.
څه موده مخکې د روسیې ولسمشر ولادیمیر پوتین ویلي چې ځواکونه به یې د اوکرایین په سوېل ختیځ کې د لوهانسک او دونیڅک ټولې سیمې ونیسي.
