۸صبح، پنجشېر: د روان کال له پیله د نږدې ۴۰۰ میلیونه افغانیو په ارزښت د زمردو له پلور سره سره، د پنجشېر د زمردو کانکېندونکي لا هم له لومړنیو وسایلو کار اخلي او ژوند یې د ځمکې ښوېيدو، واورې ښویېدنې او د ډبرو د رالوېدو له خطر سره مخ دی.
الجزیرې جمعه د اکټوبر پر ۹مه، راپور ورکړی چې د روان کال د زمردو په ۲۳مه داوطلبۍ کې شاوخوا درې زره قیراط زمرد پر کورنیو او بهرنیو پېرودونکو پلورل شوي دي.
د راپور له مخې، په افغانستان کې د روان کال له پیله د پلورل شویو زمردو ټول ارزښت نږدې ۴۰۰ میلیونه افغانیو ته رسېدلی چې د ۶.۱۲ میلیونه امریکايي ډالرو معادل کېږي.
په راپور کې راغلي چې د پنجشېر د کانونو په برخه کې څه باندې ۱۵ زره کسان کار کوي.
خو کانکېندونکي د زمردو د راایستلو لپاره له لومړنیو وسایلو، لکه بېل، کولنګ، وسپنیز مېل او برمږ کار اخلي.
د مناسبو وسایلو او تجهیزاتو نشتوالي د دوی کار ستونزمن کړی او د ځمکې ښوېيدو، واورې ښویېدنې، سېلابونو او د ډبرو لوېدو په څېر خطرونه یې زیات کړي دي.
له صادراتو مخکې د زمردو د پروسس لپاره د معیاري امکاناتو نشتوالی هم د دې برخې يوه مهمه ستونزه ده.
