۸صبح، کابل: په نړۍ کې د خوښۍ د احساس په اړه د کلني راپور له مخې فنلنډ په پرله پسې کلونو کې د نړۍ تر ټولو خوشاله هېواد بلل شوی او افغانستان د دغه لېست په اخر کې ځای لري او تر ټولو غمجن هېواد بلل شوی دی.
د ۲۰۲۳م کال د خوښۍ راپور چې د دوشنبې په ورځ د (کب ۲۹) د خوښۍ د نړۍوالې ورځې په مناسبت خپور شو، ښيي چې د خوښۍ احساس په یوه وخت کې د څو بحرانونو له رامنځته کېدو سره سره په نړۍواله کچه تر ډېره باثباته پاتې شوی دی.
دا په نړۍ کې د خوښۍ نهم راپور دی چې د خپلواکو کارپوهانو د یوې ډلې له خوا چمتو او خپور شوی دی.
په اوکراین کې د روسیې د برید او په ناټو کې د فنلنډ د غړیتوب د نه پوره کېدو له امله په اروپا کې د امنیتي وضعیت له خرابېدو سره سره، فنلنډ د شپږم کال لپاره د نړۍ د خوشحاله هېوادونو په لېست کې لومړی ځای خپل کړی دی.
د يادونې وړ ده، چې په افغانستان کې د طالبانو له بیا واکمنېدو وروسته د هېوادوالو بشري او اقتصادي وضعيت خراب شوى او ګڼې کورنۍ يې اندېښمنې کړې دي.
دغه ناوړه بشري وضعیت د دې لامل شوی، چې د هېواد اوسېدونکي له ډېرو ستونزو سره خپلې شپې او ورځې تېروي.
د نړۍ هېوادونه او مرستندویه موسسې تل د افغانستان له روان وضعیت څخه شکایت کوي او د اندېښنې وړ یې بولي.
