ایراني رسنیو راپور ورکړی چې یوې درې ته د دغه هېواد ځواکونو د لېږدونکي بس لوېدو په پېښه کې شپږ سرتېري وژل شوي او ۱۷ نور بیا ټپيان دي.
اسلامي جمهوري خبري اژانس شنبه د ډسمبر پر ۲۱مه راپور ورکړی چې دا پېښه د دغه هېواد لرستان اړوند په پاعلم سیمه کې شوې ده.
یاد خبري اژانس د لرستان د ایمرجنسي عمومي اړیکو د مدیر له قوله راپور ورکړی چې په بس کې ټوله سپاره ایراني سرتېري وو.
د ایراني رسنیو په خبره، ټاکلې وه چې دا سرتېري له خوزستان څخه کرمانشاه ته لاړ شي.
له دې وړاندې هم په ایران کې ورته پېښې شوې دي.
د ایران ډېری اوسیدونکي بیا د دغه هېواد چارواکي د موټرو د کیفیت په لوړولو کې پر بې غورۍ او ناغېړۍ تورنوي.
