۸صبح، کابل: د طالبانو د ټرانسپورټ او هوايي چلند وزارت د هوا پېژندنۍ ریاست د هېواد په ۱۱ ولایتونو کې د واورې، نسبتاً تېز باران، تالندې برېښنا، نسبتاً تېزو بادونو او سېلابونو د پېښدو خبر ورکړی دی.
نوموړي ریاست دوشنبه د وري پر ۱۳مه په یوې خپرې کړې خبرپاڼه کې ویلي چې دا اټکل سبا (سهشنبه) د سالنګونو په ګډون په بدخشان، تخار، بامیان، سمنګان، بغلان، پنجشېر، کاپیسا، پروان، نورستان، کونړ او لغمان ولایتونو کې شوی دی.
په بېلابېلو سیمو کې د باران کچه له ۱۵ تر ۳۰ ملي متره او د واورې کچه بیا له ۱۵ تر ۳۰ سانتي مترو پورې ښودل شوې ده.
د هوا پېژندنې ریاست زیاته کړې چې د سالنګونو په ګډون په لویدیځو ولایتونو کې د تېزو بادونو پېښدو اټکل شته چې چټکتیا یې په بېلابېلو سیمو کې له ۳۰ تر ۷۰ کیلومتره په ساعت کې اټکل کېږي.
د یادولو ده چې تېره اوونۍ د هېواد په بېلابېلو ولایتونو کې درانه ورښتونه شوي و.
