۸صبح، پکتیکا: د پکتیکا په برمل ولسوالۍ کې ځايي سرچینو خبر ورکړی چې د دغه ولایت او خیبرپښتونخوا ترمنځ سیمه کې یوه ښځه په وحشیانه ډول وژل شوې ده.
سرچینو سهشنبه د زمري پر ۲۰مه ۸صبح ورځپاڼې ته وویل چې د دغې ښځې جسد نن له غرمې وروسته د انګور اډې سیمې د غره په یوې لمنه کې موندل شوی دی.
د سرچینو په خبره، دا ښځه په ډبرو ویشتل شوې او له ډېرو وهلو ټکولو وروسته یې ژوند بایللی دی.
هغوی زیاته کړې چې دا ښځه د رمۍ د پيولو لپاره د دغې ولسوالۍ د غرونو لمنو ته تللې وه او ناڅرګندو کسانو وژلې ده.
سرچینې زیاته کړې چې دا ښځه ۴۵ کلنه وه او نهه اولادونه یې لرل.
دا په داسې حال کې ده چې په دې وروستیو کې د هېواد په ځينو سیمو کې د جنايي پېښو کچه زیاته شوې ده.
