۸صبح، کندهار: په کندهار کې سرچینې وايي چې د مخکېني حکومت نظامیان چې اوس په افغانستان کې ژوند کوي، د طالبانو تر جدي څار لاندې دي.
سرچینو سهشنبه د وږي پر ۲۴مه ۸صبح ورځپاڼې ته وویل چې طالبانو په کندهار او روزګان کې د مخکېنیو کورناستو نظامیانو ځانګړنې ثبت کړې او استخبارات یې په دوامداره توګه څاري.
د سرچینو په خبره، طالبانو دغو کسانو ته خبرداری ورکړی چې که میلمستیا یا بل ځای ته ځي، باید هغوی ته خبر ورکړي.
په کندهار کې یوه سرچینه وايي چې د طالبانو استخبارات هر ۱۵ ورځې وروسته له دغو کسانو څېړنۍ کوي څو ډاډه شي چې هغوی له مخالفو ډلو سره اړیکه نه لري.
ورته مهال په روزګان کې یوه بله سرچینه وايي چې که د مخکېني حکومت نظامیان ان دوه ورځې هم له خپل کوره بل ځای ته لاړ شي، طالبان یې د کورنۍ پر غړو فشار راوړي او ادعا کوي چې دا کس له مخالفو ډلو سره یو ځای شوی دی.
د سرچینې په خبره، د دغو کسانو د کورنۍ غړي هم له ګواښ سره مخ کېږي.
دا سرچینه زیاتوي چې پخواني نظامیان ان بل ولایت ته د لنډمهالي سفر پر مهال هم د طالبانو تر څار لاندې راځي او له راتګ وورسته ترې د سفر پوښتنې ګروېږنې کېږي.
دا په داسې حال کې ده چې د راپورونو له مخې، د طالبانو له واکمنېدو وروسته ګڼ پخواني نظامیان له نیول کېدو او زورزیاتي سره مخ شوي دي.
