۸صبح، کابل: په خوست ولایت کې ځایي سرچینې وايي چې د پاکستان جېټ الوتکو شاوخوا یو ساعت مخکې د دغه ولایت په مندوزيو ولسوالۍ کې د طالبانو لواء بمبار کړې ده.
سرچینو پنجشنبه، د تلې پر ۲مه، ۸صبح ورځپاڼې ته وویل چې د دغې بمبارۍ ټپیان ولایتي روغتون ته لېږدول شوي دي.
د سرچینو په وینا، دغو الوتکو شاوخوا یو نیم ساعت وړاندې د خوست سراباغ سیمه هم بمبار کړې ده؛ خو تر اوسه د دغه برید د مرګ ژوبلې په اړه کره معلومات په لاس کې نشته.
سرچینې زیاتوي چې همدا اوس هم د خوست په یو شمېر سیمو کې بېپیلوټه الوتکې د ګزمې په حال کې دي.
نن سهار هم پاکستان د کندهار او خوست ولایتونو پر بېلابېلو سیمو هوایي بریدونه وکړل.
په کندهار ولایت کې هم ځایي سرچینې وايي چې پاکستان د کندهار ښار شمال لوېديځ لوري ته د میانکو غره په لمنه کې د «د ملا صاحب سرای» سیمه بمبار کړې ده.
د سرچینو په وینا، په دې سیمه کې د طالبانو د مشر ملا هبتالله آخوندزاده اړوند یوه ځانګړې پوځي قطعه مېشته ده.
سرچینې وايي چې له بمبارۍ وروسته په سیمه کې د اور لمبې لیدل شوې دي.
له دې سره هممهاله، د پاکستان د اطلاعاتو وزیرعطاالله تارړ اعلان کړی دی چې دغه هېواد د تېرې ورځې د بېپیلوټه الوتکو د بریدونو په غبرګون کې د افغانستان په کچه پر لسو ځایونو هوایي او د بې پیلوټه الوتکو بریدونه کړي دي.
