۸صبح، کندهار: په کندهار کې سرچینې وایي چې د طالبانو د امر بالمعروف او نهی عن المنکر ریاست د دغه ولایت سوداګرۍ خونې ته امر کړی چې په سوداګریزو مراسمو کې دې د ژوندیو موجوداتو عکسونه او ویډیوګانې نه کوي.
۸صبح ته په استول شوي مکتوب کې راغلي چې دا امر سهشنبه د تلې پر ۱۴مه د طالبانو د امر بالمعروف او نهی عن المنکر وزارت د قانون پر بنسټ شوی دی.
د سوداګرو په وینا، د دوی پروګرامونه د سوداګرۍ د پراختیا، بازار موندنې او د سوداګریزو اړیکو د پیاوړتیا لپاره جوړېږي او د دغو فعالیتونو لپاره د عکس او ویډیو اخیستل اړین دي.
هغوی زیاتوي چې دا بندیز به د سوداګریزو فعالیتونو د انعکاس او د پروګرامونو د معرفي کولو بهیر له ستونزو سره مخ کړی.
دا بندیز څو اوونۍ وروسته له هغې لګېږي چې د طالبانو د ریاستالوزرا اقتصادي مرستیال ملا عبدالغني برادر په کندهار ښار کې یو سوداګریز مرکز پرانیست.
سرچینې وایي چې په دغو مراسمو کې ځينو سوداګرو د برېښنا د نشتوالي او د صنعتي پارک د ستونزو له امله د طالبانو پر مسوولانو غیرمستقیمې نیوکې کړې وې.
د سرچینو په وینا، دغو نیوکو د طالبانو د مسوولانو غبرګون راپارولی او وروسته یې د سوداګرو او سوداګرۍ خونې پر فعالیتونو دا تازه بندېز لګولی دی.
