۸صبح، کابل: په افغانستان کې د ملګرو ملتونو له ماشومانو د ملاتړ صندوق (یونیسف) استازي تاجالدین ایوالي ویلي چې د تېرو څو ورځو په اوږدو کې د تورخم له لارې څه د پاسه ۲۶ زره کسان افغانستان ته راستانه شوي دي.
نوموړي پنجشنبه د لړم پر ۱۵مه په خواله شبکې اېکس کې لیکلي چې د راستنو شویو په ډله کې نږدې ۱۵ زره یې ماشومان دي.
ایوالي ټينګار کړی چې یونیسف له خپلو شریکانو سره په ګډه هڅه کوي چې روغتیايي مرکزونه یې تل مجهز او تیار وي څو د ماشومانو اړتیا له ځنډ پرته پوره شي.
په افغانستان کې د یونیسف استازي ویلي: «یونیسف او شریکان یې ډاډ ورکوي چې روغتیايي مرکزونه شپه او ورځ فعال او مجهز وي او کورنیو ته اړتیا وړ خدمات وړاندې کړي.»
دا په داسې حال کې ده چې ایران او پاکستان د افغانانو د نیولو او ایستلو لړۍ چټکه کړې ده.
