د پاکستان په کراچۍ ښار کې د طالبانو قونسلګرۍ خبر ورکړی چې د دغه ښار د «ماچکو» په نوم د پولیسو له مرکزه ۱۵ افغان بندیان خوشې شوي دي.
دغې قونسلګرۍ پنجشنبه د تلې پر ۲۶مه، په یوه خپاره کړي بیان کې لیکلي چې دا کسان د بېلابېلو دلایلو له مخې نیول شوي وو.
په خوشې شویو کسانو کې ماشومان هم شامل دي.
دوه ورځې مخکې هم د پاکستان په کراچۍ کې د طالبانو قونسل د دغه هېواد د سند ایالت له بندخونو د ۶۰ افغان بندیانو د خوشې کېدو خبر ورکړی و.
د هغه د معلوماتو پر بنسټ، د دغه ایالت په بېلابېلو بندخونو کې تر ۹۰۰ ډېر افغانان بندیان دي.
دا په داسې حال کې ده چې څو ورځې مخکې هم د سند ایالت له بندخونو ۴۴ افغان بندیان خوشې شوي وو.
