۸صبح، کابل: د طالبانو د طبیعي پېښو پر وړاندې د مبارزې او اطفائیې ادارې مشر نورالله انصار وايي چې د کابل په پغمان ولسوالۍ کې د ګازو په یو شرکت کې د اورلګېدنې له کبله اووه کسان مړه او نهه نور ټپیان شوي دي.
انصار دا څرګندونې یکشنبه د لړم پر ۱۳مه، له رسنیو سره په خبرو کې مطرح کړې دي.
د هغه په وينا، دې اورلګېدنې د ځاني زيانونو ترڅنګ خلکو ته ډېر مالي زيانونه هم اړولي، خو کره شمېره يې تر اوسه نه ده په ډاګه شوې.
د طالبانو نوموړي مسوول زياته کړې چې د دغې ډلې پلټنې روانې دي.
طالبانو تر اوسه د دې اورلګېدنې د لامل په تړاو څه نه دي ویلي.
د یادونې ده چې تېره شپه (لړم، ١٢مه) د پغمان د «حيدرخان کلا» په سيمه کې د ګازو په یو شرکت کې د يوې لويې اورلګېدنې او څو چاودنو پېښېدو خبر ورکړل شوى و.
د چاودنې د شدت له کبله د دغه شرکت شاوخوا د ځینو کورونو ښیښې هم ماتې شوې دي.
خلکو طالبان د دې اورلګېدنې په کابو کېدو کې پر بېوسۍ تورن کړي دي.
