۸صبح، پکتیکا: د پکتيکا ځايي سرچينې وايي چې د طالبانو استخباراتو په دغه ولايت کې د ټولنيزو شبکو يو فعال نیولی دی.
سرچینو دوشنبه د مرغومې پر ۱۷مه ۸صبح ورځپاڼې ته ویلي چې نیول شوی کس له سعودي عربستانه راستون شوی و.
سرچینې وايي چې دا کس «محمداصف وطندار» نومېږي.
نوموړی د پکتیکا د خېرکوټ ولسوالۍ د «محمدحسن» کلي اصلي اوسېدونکی و چې په سعودي عربستان کې اوسېده.
سرچينو زياته کړې چې هغه څو ورځې مخکې په پکتيکا کې د طالبانو د استخباراتو له خوا نيول شوى دی.
د سرچينو د معلوماتو پر بنسټ، محمداصف وخت ناوخت په فيسبوک کې د طالبانو پر کړنو او فعاليتونو نيوکې کولې.
سرچينو زياته کړې چې د ټولنيزو رسنيو یاد فعال په دغه ولايت کې د طالبانو د محکمې له خوا په دوه مياشتني بند محکوم شوی دی.
د یادونې ده چې پر افغانستان د طالبانو له واکمنېدو وروسته دغې ډلې په دوامداره توګه د بېلابېلو پلمو له مخې ګڼ شمېر هېوادوال نيولي، شکنجه کړي او په ځينو مواردو کې يې ان وژلي دي.
نړیوالې ټولنې او د بشري حقونو سازمانونو په وار وار د طالبانو پر دې کړنو نیوکې کړې دي.
