۸صبح، کاپیسا: سیمهییزې سرچینې وايي چې طالبانو په کاپیسا کې د مخکېني حکومت د مصالحې عالي شورا مشر ډاکټر عبدالله عبدالله یو مخکېنی سلاکار ډاکټر غلام دستګیر صدیقي نیولی دی.
سرچینو سهشنبه د سلواغې پر ۲مه، ۸صبح ورځپاڼې ته ویلي چې صدیقي او زوی یې درې ورځې مخکې د کوهستان د دویمې حصې ولسوالۍ اړوند له کاریزي کلي څخه نیول شوي دي.
د سرچینو په وینا، ډاکټر غلام دستګیر په کاپیسا کې د طالبانو د عامې روغتیا په ریاست کې هم دنده درلوده.
د نوموړي کس د نیول کېدو لامل لا تر اوسه څرګند نه دی.
طالبانو هم تر اوسه په دې تړاو څه ویلي نه دي.
دا په داسې حال کې ده چې طالبانو تېره اوونۍ په کابل کې د عبدالله عبدالله یو مخکېنی ساتونکی او د هغه ورور نیولي وو.
دا دوه وروڼه مجیب او نجمالدین نومېږي او په کابل ښار نيول شوي دي.
