۸صبح، تخار: د تخار ځايي سرچینې وايي چې طالبانو په مخکېني حکومت کې د دغه ولایت امنیه قومندان، نورمحمد حکیمي ورور د دویم ځل لپاره نیولی دی.
سرچینو دوشنبه د سلواغې پر ۸مه، ویلي چې طالبانو دا کس د تخار ولایت له مرکز تالقان ښار څخه نیولی او ناڅرګند ځای ته یې لېږدولی دی.
د سرچینو په وینا، نیول شوی کس نېکمحمد حکیمي نومېږي او کورنۍ یې د هغه له برخلیک څخه ناخبره ده.
سرچینو زیاته کړې چې نېکمحمد حکیمي د تالقان ښاروالۍ پخوانی کارکوونکی و او طالبانو د لومړي ځل لپاره د روان کال د چنګاښ میاشنې په وروستیو کې نیولی و.
په تخار کې طالبانو تراوسه په دې تړاو څه ویلي نه دي.
دا په داسې حال کې ده چې طالبانو په تېرو دوو ورځو کې له تالقان ښار څخه د درېیو پخوانیو سرتېرو په ګډون لږترلږه شپږ کسان نیولي او بندیان کړي دي.
