۸صبح، پروان: په پروان کې ځايي سرچینې وايي چې طالبانو د دغه ولایت په سالنګ ولسوالۍ کې د درېیو زلمیانو په ګډون شپږ ملکیان نیولي دي.
سرچینو یکشنبه د وږي پر لومړۍ ۸صبح ورځپاڼې ته وویل چې دا کسان شپږ ورځې مخکې شپه مهال نیول شوي دي.
د سرچینو په خبره، نیول شوي د جنوبي سالنګ د «للمه سبزک» کلي اوسېدونکي دي.
دوو نیولو شویو کسانو رییس اغا سالنګی او نصرالله د مخکېني حکومت په پولیسو کې دندې لرلې او د طالبانو له واکمنېدو وروستو یې شخصي کارونو ته مخه کړې وه.
څلور نور بیا شریف، محمد اغا، میرویس او سهراب نومېږي.
سرچینو زیاته کړې چې د دغو کسانو کورنۍ تر اوسه د هغوی له برخلیکه خبر نه دي.
سرچینو ادعا کړې چې طالبانو دا کسان پر یوې پوستې د برید په تور نیولي دي.
خو سرچینې ټينګار کوي چې نیول شوي ملکیان دي او له هېڅ سیاسي – نظامي ډلې سره تړاو نه لري.
تېره پنجشنبه د طالبانو استخباراتو په سالنګ ولسوالۍ کې د یو لړ عملیاتو په پایله کې د احمد مسعود په مشرۍ د «مقاومت جبهې» قوماندان حسیب پنجشیری له خپلو دوو ملګرو سره ووژل او لس نور یې ونیول.
