۸صبح، کابل: طالبانو په پروان کې د جبلالسراج د سمنټو فابریکې د دویمې برخې د جوړولو د کار پیل اخبر ور کړ. د دوی په وینا دا پروژه به له بشپړېدو وروسته په ۲۴ ساعتونو کې د ۱۰ زره ټنه سمنټو د تولید وړتیا ولري.
د طالبانو د رسنیو مرکز پرون د چارشنبې په ورځ په پروان کې په یوې ناسته کې د جبلالسراج د سمنټو فابریکې د دویمې برخې د جوړولو د کار پرانیستنه اعلان کړه.
د طالبانو د ریاستالوزرا اداري مرستیال عبدالسلام حنفي په دې ناسته کې وویل چې دا پروژه به د دغې ډلې تر کنټرول لاندې د ملي پراختیا شرکت لهخوا پلې او تمویل شي.
حنفي ادعا کړې چې دا فابریکه په ۲۴ ساعتونو کې د ۱۰ زره ټنه سمنټو د تولید وړتیا لري.
هغه زیاته کړې چې افغانستان به ډېر ژر نورو هېوادونو ته د سمنټو د صادراتو شاهد وي.
دا په داسې حال کې ده چې د دغې فابریکې د لومړۍ برخې تړون په ۱۴۰۲ کال کې له یو قطري شرکت سره د ۲۲۰ میلیونو ډالرو په ارزښت لاسلیک شوی و.
د جبلالسراج د سمنټو د تولید فابریکه په ۱۳۳۷ کال کې د ۱۰ میلیونه افغانیو په پانګونې سره جوړه شوه خو فعالیت یې په بېلابېلو پړاوونو کې د بېلابېلو لاملونو له امله درېدلی دی.
د افغانستان د مخکیني حکومت د کانونو او پټرولیم وزارت په ۲۰۱۸ کال کې اعلان کړی و چې د دغې فابریکې د دویمې برخې جوړول د ۱۷۰ میلیونو ډالرو په پانګونې او په کال کې د یو میلیون ټنه سمنټو د تولید په وړتیا سره داوطلبۍ ته وړاندې کېږي.
