۸صبح، بدخشان: سیمهییزې سرچینې وايي چې د بدخشان وضعیت طالب چارواکي اندېښمن کړي او تېره شپه د طالبانو دفاع وزیر ملا محمدیعقوب مجاهد واخان او اشکاشم ولسوالیو ته سفر کړی دی.
سرچینو پنجشنبه د چنګاښ پر ۱۱مه ۸صبح ورځپاڼې ته وویل چې د دغه سفر موخه په بدخشان کې د امنیتي وضعیت او د قطعاتو او پوځي وړتیاوو ارزونه وه.
ویل کېږي چې په شغنان کې د ولسوالیو له استازو سره په ناستو کې د دې ډلې د تبلیغ لپاره ډېرې پیسې وېشل شوې دي.
ورته مهال سرچینو ادعا کړې چې طالبان په بدخشان کې ځانګړې شوې ۵۰ میلیونه افغانۍ بودیجه د ناراضي بدخشاني طالبانو او مخالفانو د ځپلو لپاره مصرفوي.
په وروستیو اوونیو کې په بدخشان کې ترینګلتیاوې زیاتې شوې او تر اوسه طالب چارواکو څو وارې دغه ولایت ته سفر کړی او له دې وړاندې هم یعقوب مجاهد جرم ولسوالۍ ته تللی و.
هغه معلومات چې ۸صبح ورځپاڼې ته رسېدلي، په بدخشان کې د طالبانو والي او د کانونو رییس د وسلو د لېږد کارتونو د ټولولو لپاره د دغه ولایت شهر بزرګ ولسوالۍ ته تللي و.
