۸صبح، کابل: طالبانو د اقتصادي همکاریو سازمان «ایکو» په څوارلسمه ناسته کې د افغان ټرانس او بلخ – هرات – کندهار اوسپنې پټلۍ پر پروژو، د رېل له لارې د لېږد رالېږد د زیاتوالي او د افغانستان او ایران ترمنځ د مسافر وړونکو اورګاډو د فعالیت د پیل په اړه خبرې کړې دي.
باختر خبري اژانس شنبه د تلې پر ۲۵مه راپور ورکړی چې د طالبانو د اوسپنې پټلۍ ادارې عمومي رییس عبدالکریم فاتح د قراقستان په پلازمېنې استانه ښار کې د ایکو سازمان په ناسته کې ګډون کړی و.
د راپور له مخې، د ایکو په غونډه کې د ترانزیټي بهیر د ډیجیټلي کولو، د پانګونې د راجلبولو او د اوسپنې پټلۍ له لارې د لېږد رالېږد د پراختیا په اړه هم بحث شوی دی.
فاتح د قزاقستان، ازبکستان، پاکستان او ایران له استازو سره د اوسپنې پټلۍ د ګډو پروژو د پلي کولو په اړه هم خبرې کړې دي.
د افغانستان او ایران ترمنځ د مسافر وړونکو اورګاډو د فعالیت پیل هم د دې ناستې یوه برخه وه.
