۸صبح، کابل: د ملګرو ملتونو د کډوالو عالي کمېشنري (UNHCR) وايي، په کور دننه بېځایه شوي کسان او هغه کورنۍ چې له ګاونډیو هېوادونو بېرته افغانستان ته راستنېږي، له بېلابېلو بشري ناورينونو سره مخ دي او مرستو ته اړتیا لري.
دغه سازمان شنبه د تلې پر ۲۵مه، پر اېکس پاڼه لیکلي چې لوږې، طبیعي پېښو او هممهالو ناورينونو د افغان کورنیو ژوند ستونزمن کړی دی.
د دغه سازمان په وینا، تر یو میلیون ډېر کسان اړ شوي چې له ګاونډیو هېوادونو بېرته افغانستان ته راستانه شي.
د ملګرو ملتونو د کډوالو عالي کمېشنري زیاته کړې چې ډېری دغه کسان په سختو شرایطو کې هېواد ته راستنېږي او له نامعلوم راتلونکي سره مخ دي.
دغه سازمان خبرداری ورکړی چې د کډوالو پراخه راستنېدنه په افغانستان کې بشري ناورين لا پسې سختوي او بېړنیو مرستو ته اړتیا زیاتوي.
دغه بنسټ ټینګار کړی چې اړمنو کورنیو ته د حیاتي او د ژوند ژغورونکو مرستو د برابرولو لپاره لا ډېر ملاتړ ته اړتیا لري.
