۸صبح، کابل: طالبانو خبر ورکړی چې په افغانستان کې د برېښنا د تولید، بیارغونې او د انرژۍ تاسیساتو د پراختیا په برخه کې یې له څلورو روسي شرکتونو سره پر پانګونې خبرې کړې دي.
باختر خبري اژانس دوشنبه د چنګاښ پر ۱۵مه راپور ورکړی چې د طالبانو تر کنټرول لاندې د افغانستان برېښنا شرکت اجرایوي رییس عبدالحق همکار د څلورو روسي شرکتونو له استازو سره د برېښنا د تولید او برېښنا کوټونو د بیارغونې په اړه غونډه کړې ده.
د راپور له مخې، د روسي شرکتونو استازو د ډبرو سکرو په مرسته د برېښنا، ګازو او حرارتي انرژۍ د تولید، د برېښنا کوټونو د ظرفیت لوړولو او د نوې ټيکنالوژۍ طرحې وړاندې کړې دي.
دواړو لورو هوکړه کړې چې روسي پانګوال به ژر په افغانستان کې د برېښنا د تولیدي تاسیساتو تخنیکي ارزونې پیل کړي.
عبدالحق همکار د برېښنا د تولید په برخه کې د پانګونې فرصتونه، د برېښنا د تولید سټيشنونو بیارغونه او د انرژۍ د تولید د سیستمونو عصري کول د ګډو ګټو د تامین لپاره مهم بللي او ویلي یې دي چې په دې برخه کې له پانګوالو سره همکارۍ ته چمتووالی لري.
دا په داسې حال کې ده چې افغانستان د برېښنا له کمښت سره مخ دی او د اړتیا وړ ډېره برېښنا له ګاونډیو هېوادونو واردوي.
