۸صبح، کابل: د طالبانو د ریاستالوزرا اداري مرستیال عبدالسلام حنفي د افغانستان لپاره د اسلامي همکاریو سازمان له ځانګړي استازي سره کتلي دي.
د طالبانو ویاند حمدالله فطرت يکشنبه د تلې پر ۱۹مه، په یوه خبرپاڼه کې ویلي چې طارق علي بخیت په دې کتنه کې په بشري، ښوونیزو او روغتیايي برخو کې له افغانستان سره د اسلامي همکاریو سازمان د مرستو پر دوام ټینګار کړی دی.
بخیت زیاته کړې چې د دغه سازمان په همکارۍ په افغانستان کې څو پروژې د پلي کېدو په حال کې دي.
هغه همداراز ټینګار کړی چې د افغانستان او ځینو ګاونډیو هېوادونو ترمنځ رامنځته شوې ستونزې باید د خبرو اترو او تفاهم له لارې حل شي.
عبدالسلام حنفي د اسلامي همکاریو سازمانه غوښتي چې له افغانستان سره په بېلابېلو برخو کې خپلې مرستې زیاتې کړي.
هغه همداراز ټینګار کړی چې د نشهيي توکو پر وړاندې د مبارزې په پام کې نیولو سره باید د بدیل معیشت پروګرامونو ته لا ډېره پاملرنه وشي.
