۸صبح، کابل: د طالبانو د عدلیې وزارت یو وار بیا ټینګار کړی چې د دغې ډلې د غایب مشر ملا هبتالله اخوندزاده د حکم پر بنسټ، هېڅوک په یو وخت کې د دوو رسمي «دولتي» دندو د ترسره کولو اجازه نه لري.
نوموړي وزارت پنجشنبه د مرغومې پر ۲۷مه، په یو بیان کې زیاته کړې چې د ډلې هېڅ لوړپوړی یا ټیټپوړی چارواکی نه شي کولای په یو وخت کې دوه رسمي دندې ولري.
د دغه حکم پر بنسټ، هغه کسان چې په یو وخت کې دوه رسمي دندې ترسره کوي، یوه یې باید پرېږدي.
د یادونې ده چې د طالبانو مشر دا حکم د ۱۴۰۲ کال د غبرګولي په میاشت کې صادر کړی و او د دغې ډلې د عدلیې وزارت یو وار بیا د دغه حکم پر پلي کېدو ټینګار کړی دی.
دا په داسې حال کې ده چې د دغې ډلې ډېری جنګیالي د تېرو ۲۰ کلونو د جنګي مخینې پر بنسټ په دولتي ادارو کې ګمارل کېږي.
