۸صبح، کابل: د ملګرو ملتونو د بشري استوګنې پروګرام (UN-Habitat) وايي، راستنېدونکو کورنیو ته د مناسبې سرپناه برابرول او بنسټیزو خدمتونو ته د هغوی لاسرسی اړین دی.
دغه بنسټ چهارشنبه د تلې پر ۲۹مه، پر خپله اېکس پاڼه لیکلي چې د راستنېدونکو کورنیو د وضعیت د ښه کولو لپاره باید نور اقدامات هم وشي.
دغه بنسټ ټینګار کړی چې افغانستان ته راستنېدل باید په خپل هېواد کې د نوي ژوند د پیل فرصت وي، نه د نویو ستونزو د پیل.
دا په داسې حال کې ده چې تر دې وړاندې د ملګرو ملتونو د بشري مرستو د همغږۍ دفتر (اوچا) هم په افغانستان کې د لوږې د خطر د زیاتېدو په اړه خبرداری ورکړی و.
اوچا ویلي چې په افغانستان کې شاوخوا ۱۶ میلیونه کسان د خوړو له ناامنۍ سره مخ دي او اټکل کېږي چې د ژمي په رارسېدو سره به دا شمېر شاوخوا ۱۹ میلیونو ته لوړ شي.
