۸صبح، کابل: د طالبانو ویاند ذبیحالله مجاهد د تاجکستان د پارلمان مشر وروستیو څرګندونو ته په غبرګون کې ويلي چې دوی هېڅ ډلې ته اجازه نه ورکوي څو د افغانستان له خاورې د نورو هېوادونو پر ضد فعالیت وکړي.
مجاهد سېشنبه د غبرګولي پر ۱۵مه د طالبانو تر کنټرول لاندې ملي راډیو-ټلویزیون ته ویلي چې د طالبانو د واکمنۍ په نږدې درې کلنه واکمنۍ کې د افغانستان له خاورې هېڅ هېواد ته زیان نه دی رسېدلی.
هغه زیاته کړې ده: «[طالبان] د خپلې ستراتېژۍ او پلان له مخې هیچاته اجازه نه ورکوي څو د افغانستان خاوره د نورو هېوادونو پر ضد وکاروي.»
دا په داسې حال کې ده چې تېره ورځ د تاجکستان د پارلمان مشر او د دغه هېواد د ولسمشر زوی رستم امامعلي ویلي چې د طالبانو تر واک لاندې افغانستان یو ځل بیا د «ترهګرۍ پر مرکز» بدل شوی دی.
نوموړي دا څرګندونې د قزاقستان په الماتا ښار کې د ګډ امنیتي تړون سازمان د غړو هېوادونو د پارلمانونو د مشرانو په غونډه کې کړې دي.
د هغه په وينا، په افغانستان کې ديني مدرسې «ځانمرګي جهاديان روزي.»
د سیمې هېوادونو تل اندېښنه ښودلې چې افغانستان د ترهګرۍ پر مرکز بدل شوی دی.
