۸صبح، کابل: طالبانو خبر ورکړی چې پرون ۸۲۹ کډوالې کورنۍ چې څلور زره او ۴۱۵ کسان کېږي، افغانستان ته راغلې دي.
د طالبانو مرستیال ویاند حمدالله فطرت یکشنبه د چنګاښ پر ۲۸مه په خپرې کړې خبرپاڼه کې لیکلي چې یوازې د تورخم له لارې ۷۱۲ کورنۍ راستنې شوې دي.
د خبرپاڼې له مخې، په کندهار کې د سپین بولدک له لارې ۷۳ کورنۍ، په هرات کې د اسلام کلا له لارې درې او د نیمروز له لارې ۴۱ کورنۍ افغانستان ته راغلې دي.
دا په داسې حال کې ده چې په دې وروستیو میاشتو کې له ګاونډيو هېوادونو د افغان کډوالو د راستنولو لړۍ چټکه شوې ده.
د کډوالۍ نړیوال سازمان (IOM) هم خبر ورکړی چې په ۲۰۲۵ میلادي کال کې له پاکستانه څه باندې یو میلیون افغانان راستانه شوي دي.
