طالبانو په تېرو څه باندې پنځو کالو کې ګڼ کسان په عام محضر کې او داسې چې لاسونه یې تړلي وو، په ډزو وژلي دي. تازه ۸صبح ورځپاڼې ته یوه ویډیو رسېدلې چې ښيي یو ۳۰ کلن ځوان د هرات ښار په یوه سیمه کې له شکنجې او وهلو ټکولو وروسته، په داسې حال کې چې لاسونه یې تړلي وو، د طالبانو له خوا په ډزو وژل کېږي. د دې پېښې د څرنګوالي په اړه کره جزییات څرګند نه دي. د دغه ځوان خپلوان وايي، که نوموړي د طالبانو په اند کوم جرم کړی و، باید احضار او محکمې ته وړاندې شوی وای، نه دا چې د خلکو په مخکې او په تړلو لاسونو په ډزو ووژل شي. د دغه ځوان مور له طالب چارواکو غوښتي چې د زوی قضیې ته یې پاملرنه وکړي. له دې مخکې سرچینو تایید کړې وه چې طالبانو په هرات کې د جمعې په ورځ یو کس وژلی دی.
ځايي سرچینو یوه ویډیو استولې چې پکې یو کس له شکنجې او د لاسونو له تړل کېدو وروسته په ډزو وژل کېږي. سرچینو ویلي چې دغه ۳۰ کلن کس عبدالقدیر پهلوانزاده نومېده او د تېرې جمعې په ورځ د مازدیګر په پنځو بجو د هرات ښار د څلورمې حوزې اړوند په لومړۍ پوسته کې، د تېلو ټانک ته مخامخ، د طالبانو د یوه قوماندان د مېرمنې د ورور له لوري په ډزو وژل شوی دی. په ویډیو کې هم لیدل کېږي چې یو ځوان له شکنجې او د لاسونو له تړل کېدو وروسته، د یوه کس له لوري په ډزو په نښه کېږي.
د سرچینو په خبره، په دې ویډیو کې په پښتون زرغون کې د طالبانو امنیه قوماندان سید احمد محمدي، د هغه ورور او د مېرمنې ورور یې هم حضور لري. سرچینې زیاتوي چې د طالبانو امنیه قوماندان دا اقدام له دې امله کړې چې تر دې مخکې یې خپل اوښی راضي کړی و چې خپله خور دغه طالب قوماندان ته په نکاح کړي.
سرچینې زیاتوي چې په ویډیو کې هغه کس چې واسکټ او تور کالي یې اغوستي، د پښتون زرغون ولسوالۍ لپاره د طالبانو امنیه قوماندان دی؛ هغه کس چې عبدالقدیر د ټوپک په میل وهي، د طالبانو د امنیه قوماندان ورور او هغه کس چې پر عبدالقدیر ډزې کوي، د طالبانو د امنیه قوماندان د مېرمنې ورور دی. د سرچینو په خبره، عبدالقدیر له خپل موټرسایکل سره د تېلو ټانک ته تللی و، چې هلته د دغو کسانو لاس ته لوېدلی دی.
سرچینې ټینګار کوي چې د دغه کس د مور غږ تر هېچا نه دی رسېدلی او طالبانو هغه وېرولې چې د قضیې د څارلو هڅه ونه کړي.
د سرچینو په خبره، عبدالقدیر پهلوانزاده په هرات ښار کې پر ویلډینګکارۍ بوخت و او له هېڅ ډلې سره یې تړاو نه درلود. د پهلوانزاده کورنۍ ټینګار کوي چې هغه هېڅ پوځي مخینه هم نه لرله او مخکې هم طالبانو نه و نیولی. هغوی زیاتوي چې طالبان د دغې قضیې څېړلو ته چمتو نه دي.
طالبانو تر اوسه پر وژل شوي کس هېڅ ډول تور نه دی لګولی او یوازې یې د هغه پر کورنۍ، په ځانګړې توګه پر مور فشار راوړی، څو د دې پېښې له څارلو لاس واخلي.
له دې مخکې هم له پنجشېر، اندراب او بدخشان څخه داسې ویډیوګانې خپرې شوې وې چې پکې ښکارېدل طالبان ځينې کسان په داسې حال کې چې لاسونه یې تړلي وو، په ډزو وژني. دغې ډلې لسګونه نور هم له مخالفو ډلو سره د غړیتوب په تور په ډزو وژلي دي.
په افغانستان کې د ملګرو ملتونو د مرستندویه پلاوي دفتر (یوناما) هم په ګڼو راپورونو کې د طالبانو له لوري له قضايي بهیر پرته وژنې او صحرایي محاکمې مستندې کړې دي. د یوناما په یوه راپور کې چې د ۲۰۲۳ کال په اګست کې خپور شوی، راغلي چې دې ډلې د ۲۰۲۱ کال له اګست څخه د ۲۰۲۳ کال تر جون پورې، ۲۱۸ پخواني امنیتي غړي وژلي دي. همدارنګه، د اجباري ورکېدو ۱۴ پېښې، له ۴۲۴ څخه ډېرې د خپلسرو نیونو او توقیفونو پېښې او څه باندې ۱۴۴ د شکنجې او ناوړه چلند موارد ثبت شوي دي.
