ملګري ملتونه وايي چې په نړۍ کې ۲.۲ میلیارده کسان د څښاک پاکو ته لاسرسی نه لري او میلیاردونه نور بیا له روغتیايي خدماتو او حفظالصحې له لومړنیو اسانتیاوو بې برخې دي.
نوموړي بنسټ شنبه د اکتوبر پر ۱۷مه راپور ورکړی چې ۳.۴ میلیارده وګړي خوندي روغتیايي خدماتو ته لاسرسی نه لري او ۱.۷ میلیارده نور په خپلو کورونو کې د حفظالصحې له لومړنیو اسانتیاوو محروم دي.
د راپور له مخې، په نړۍ کې د اوبو سرچینې د ککړتیا، پر سرچینو د پراخ فشار او کمزوري مدیریت له کبله له جدي ننګونو سره مخ دي.
ملګرو ملتونو زیاته کړې چې یوازې ۵۶ سلنه فاضلاب په خوندي توګه تصفیه کېږي.
دغه بنسټ ویلي چې د اوبو سرچینو په مدیریت کې د هېوادونو همکاري محدوده ده او د نړۍ په ځينو سیمو کې لا هم د اوبو پر سرچینو فشار په کړکېچن وضعیت کې دی.
ملګرو ملتونو زیاته کړې چې په نړۍ کې شاخوا څلور میلیارده وګړي لږ تر لږه په کال کې یوه میاشت د اوبو له شدید کمښت سره مخ کېږي.
