۸صبح، کابل: د طالبانو د ریاست الوزرا اقتصادي مرستیال ملا عبدالغني برادر او د ترکمنستان ملي رهبر قربانعلي بردي محمدوف د ټاپي پروژې پر وروستيو پرمختګونو او د دوه اړخیزو همکارو پر پراختیا خبرې کړې دي.
باختر خبري اژانس دوشنبه د زمري پر ۱۹مه راپور ورکړی چې دا ناسته د هرات په تورغونډۍ کې شوې ده.
ملا برادر د ټاپي پروژې د پاتې موضوعاتو پر هواري او افغانانو ته د ډېرو کاري بوختیاوو د برابرولو غوښتنه کړې ده.
په دې لیدنه کې د تېلو د ترانزیټ لپاره د ایکریم بندر پر بیا پرانیستلو، د ترکمنباشي بندر له لارې د افغانستان د توکو لېږد ته پر اسانتیا، د لاجورد لارې د فعالولو او د هرات – تورغونډۍ د اوسپنې پټلۍ پر بیارغونې او پراختیا هم ټینګار شوی دی.
قربانقلي برديمحمدوف د دواړو لورو ترمنځ اړیکې د ښه ګاونډیتوب پر بنسټ وبللې او ویلي یې دي چې ترکمنستان چمتو دی تر هرات پورې د ټاپي پروژې د بشپړولو، د ګازو د وېش شبکې د جوړولو او د ټاپ پروژې د عملي چارو د پیل لپاره همکاري وکړي.
