طالبانو د تېرو درېیو کالو په لړ کې په خپلسري توګه مخکېني پوځيان نیولي، ربړولي یا یې وژلي دي. هغوی له پخوانیو پوځيانو د غچاخیستنې په دوام، په پکتیکا کې لسګونه کسان نیولي او وژلي دي. طالبانو په پکتیکا او نورو څنګلورو ولایتونو کې د پخوانیو پوځيانو نږدې خپلوان او د کورنۍ غړي ګواښلي چې د مخکېنیو پوځيانو د نیولو او وژلو په تړاو له رسنیو سره خبرې ونه کړي. دغې ډلې په پکتیکا کې پر پخوانیو معلولو ځواکونو هم رحم کړی نه دی او دغه راز، په مخکېني حکومت کې د ځينو پوځيانو قبرونه یې ویجاړ کړې دي.
پکتیکا د هېواد په سوېل ختیځ کې پروت هغه ولایت دی چې د جمهوریت په وروستیو شپو ورځو کې د طالبانو لاس ته ولوېد. د نوموړي ولایت د ځینو اوسېدونکو په وینا، د جګړو په کلونو کې د دغه ولایت پخوانیو پوځيانو په دغه ولایت کې له طالبانو سره د مبارزې ترڅنګ د څنګلورو ولایتونو لکه غزني او پکتیا په عملیاتو کې هم ګډون کاوه.
په پکتیکا کې د ۸صبح ورځپاڼې موندنې ښيي چې طالبانو په دغه ولایت کې له پخوانیو پوځيانو غچ اخیستی دی او ځينې یې څارلي، نیولي یا یې تاوتریخوالی ورسره کړی دی. په یاد ولایت کې د پخوانیو پوځيانو د وژل کېدو شمېرې څرګندې نه دي؛ خو سرچینې وايي چې په دغه ولایت کې پخواني پوځيان نیول شوي، شکنجه شوي او په صحرايي توګه محاکمه شوي دي.
طالبانو په مخکېني حکومت کې د ځانګړو ځواکونو قبر چې د پکتیکا په ارګون ولسوالۍ کې دی، چاودنه ورکړې او یو سرتېری چې سترګې یې په یوې چاودنه کې له لاسه ورکړې وې، د کور مخته په ډزو وواژه.
په مخکېني حکومت کې د بکخېل ولسوالۍ د پولیسو قوماندان بدرالدین حیدري چې په بدو مشهور و، د حکومت له پرځېدو وروسته پاکستان ته تللی و. نوموړی هېواد ته له راستنېدو وروسته، د ۱۴۰۱ د کب پر ۱۰مه په خوست کې ونیول شو. طالبانو نوموړی پکتیکا ته یووړ او په سبا یې په یوې صحرايي محکمه کې په ډزو وواژه.
ګلخان د پکتیکا په مټاخان ولسوالۍ کې د مخکېني حکومت پر مهال د ولسي پولیسو یو قوماندان و. نوموړی د ۱۴۰۱ کال د تلې پر ۲۰مه له خپلې کورنۍ سره روان و چې طالبانو یې پر موټر ډزې وکړې. په دې پېښه کې د نوموړي یو زوی ووژل شو، خپله او د کورنۍ دوه نور غړي یې ټپيان شول.
عبدالعلیم چې په پخواني حکومت کې د پولیسو یو سرتېری و، سترګې یې د طالبانو له واکمنېدو وړاندې په یوې چاودنه کې له لاسه ورکړې وې. طالبانو نوموړی د ۱۴۰۲ کال د تلې پر ۱۰مه د جانيخېل ولسوالۍ په جلالزي کلي کې د خپل کور مخته په ډزو وواژه.
عبدالعلیم له دې وړاندې هم له طالبانو سره په جګړه کې د خپلې کورنۍ ۱۲ غړي له لاسه ورکړي وو. نوموړی د څو کونډو او یتیمانو په ګډون د یوې ۳۰ کسیزې کورنۍ سرپرست و.
طالبانو د غچاخیستنې په دوام، د ۱۴۰۲ کال د زمري پر ۱۹مه په پخواني حکومت کې د پکتیکا د مرستیال والي ورور له خپل کور څخه چې د دغه ولایت په یوسفخېلو ولسوالۍ کې و، وتښتاوه او یوه ورځ وروسته یې مړه پېدا شو. دا کس محمدیاسین نومېده او په کابل کې د نظامي برخې محصل و.
د دې ترڅنګ، طالبانو د دغه ولایت یو پوځي له پاکستانه تر راتګ وروسته په کندهار کې ونیوه او یو بل پوځي چې له ایران څخه راستون شوی و، په هلمند کې نیولی دی. د یو کال په تېرېدو لاهم د دغو دوو کسانو له برخلیک څخه معلومات نه شته.
د یادونې ده چې طالبانو په پکتیکا کې د پخواني پوځيانو په نیولو، شکنجه کولو او وژلو بسنه کړې نه ده؛ بلکې د جمهوریت د دوو قوماندانانو قبرونو ته یې چاودنه هم ورکړې ده.
طالبانو د د ۱۴۰۰ کال په جدي کې په پکتیکا کې د یوه پخواني پوځي قبر ته چې دریاخان تلاش نومېده، چاودنه ورکړه او دغه راز، د ۱۴۰۱ کال په غبرګولي میاشت کې یې په سوېل ختیځ کې د پخوانیو ځانګړو پولیسو قوماندان عزیزالله کاروان قبر هم ویجاړ کړ.
طالبانو د تېرو درېیو کالو په لړ کې په بېلابېلو ولایتونو کې پخواني پوځيان په نښه کړي دي. دا په داسې حال کې ده چې د طالبانو کورنیو چارو وزیر تېره اوونۍ په پکتیا کې یوې ناستې ته ویلي چې د خپل مشر اعلان شوې ټولبښنې ته ژمن دي.
