د امريکا د بهرنيو چارو وزير انتوني بلېنکن به په نيويارک کې د چين د بهرنيو چارو له وزير وانګيي سره وویني.
د امریکا د بهرنیو چارو وزارت ویلي چې د دواړو هېوادونو جګپوړي ډیپلوماټان به جمعه د سپټمبر پر ۲۷ په نیویارک کې وویني.
رویټرز خبري اژانس راپور ورکړی چې د نړۍ د دوو سترو اقتصادونو ترمنځ اړیکې د اوکراین، ټایوان او غزې جګړې پر سر ترینګلې شوې دي.
په اوکراین کې د جګړې له پېل راهیسې امریکا د روسیې او چین اړیکو ته اندېښمنه ده.
ورته مهال، چین د ټایوان او واشنګټن ترمنځ اړیکې د خپلو جدي اندیښنو په توګه مطرح کوي.
امریکا د ټایوان ترټولو اړین نړیوال ملاتړکونکی او د دغه هېواد د وسلو تمویلونکی دی.
دا په داسې حال کې ده چې یوه میاشت مخکې د امریکا بهرنیو چارو وزارت یوه چارواکي ویلي و چې د واشنګټن لپاره د چین ننګونې د سړې جګړې له ننګونو څخه ډېرې دي.
که څه هم امريکا ویلي چې له بېجينګ سره د سړې جګړې په لټه کې نه ده، خو د دوو زبرځواکونو ترمنځ سيالي د سړې جګړې نوی سبک ښيي.
ټاکل شوې چې د امریکا ولسمشر جو بایډن او د چین ولسمشر شي جین پینګ ترمنځ ټیلفوني خبرې وشي.
