د امريکا د بهرنيو چارو وزارت د دغه هېواد د ډېوېډ لېن په نوم د یو روحاني چې له ۲۰۰۶ کال راهیسې د چین دولت په بند کې و، د ازادېدو خبر ورکړی دی.
د دغه وزارت یو ویاند چې په راپور کې یې نوم نه دی لیکل شوی، یکشنبه د سپټمبر پر ۱۵مه فرانسپرېس خبري اژانس ته ویلي چې لېن امریکا ته رسېدلی دی.
هغه زیاته کړې: «ډېوېډ لېن بېرته امریکا ته رسېدلی او اوس د لومړي ځل لپاره کولای شي له ۲۰ کلونو وروسته خپله کورنۍ وویني.»
دې امریکايي چارواکي د ډېوېډ لېن د ازادېدو ستاینه کړې ده.
د معلوماتو پر بنسټ، دا امریکايي روحاني په یو تړون کې د درغلۍ په تور په عمري بند محکوم شوی و.
د دغه راپور له مخې، لا هم په چین کې زیات شمېر امریکایان بندیان دي.
د دغه هېواد یو سوداګر کای لي هم په دې بندیانو کې دی چې په ۲۰۱۶ کال کې د جاسوسۍ په تور نیول شوی و.
د یادونې ده چې امریکايي چارواکو چین ته د خپلو سفرونو په ترڅ کې د دغه هېواد پر دولت د امریکايي وګړو د ازادېدو لپاره فشارونه ډېر کړي دي.
