د چین د سوداګرۍ وزارت له روسیې سره د اړیکو له کبله پر یو شمېر چینايي شرکتونو د بندیزونو لګولو په هکله د امریکا وروستۍ پرېکړه یو اړخیز اقدام او د نړیوالو سوداګریزو قوانینو خلاف یې بللی دی.
دغه وزارت یکشنبه د اګست پر ۲۵مه په یوې خپره کړې اعلامیه کې ویلي چې د امریکا دا پرېکړه به سوداګري او نړیوال اقتصاد له خنډ سره مخ کړي.
د ګلوبل ټایمز د راپور پر بنسټ، چین له امریکا غوښتي چې ژر تر ژره دا بندیزونه لېرې کړي.
په دې اعلامیه کې راغلي: «موږ د امریکا وروستۍ پرېکړه په کلکه غندو چې څو چینایي شرکتونه یې له روسیې سره د اړیکو له کبله د بندیزونو په لېست کې شامل کړي دي.»
بېجينګ ټينګار کړی چې د چينايي شرکتونو د حقونو دفاع لپاره به لازم اقدامات ترسره کړي.
دا په داسې حال کې ده چې څو میاشتې دمخه د امریکا د خزانو وزارت د دغه هېواد د امنیت وزارت د استخباراتو ادارې اړوند د «ووهان شیائورویشي علوم او ټکنالوژي» په نوم پر یو چینايي شرکت د امریکا پر مهمو بنسټونو د سایبري بریدونو د ترسره کولو له کبله بندیز ولګاوه.
