۸صبح، کندوز: د افغانستان د ازادۍ جبهې ادعا کړې چې په کندوز ښار کې یې د طالبانو پر یوه ښاري ګزمه برید کړی دی.
ازادۍ جبهې چهارشنبه د چنګاښ پر ۱۰مه پر خپله اېکس پاڼه لیکلي چې دا برید تېره شپه د کندوز ښار د کارته آریانا په سیمه کې شوی دی.
دې جبهې ادعا کړې چې د طالبانو پر دې ښاري ګزمه د برید په پایله کې دوه طالب جنګیالي وژل شوي او یو بل ټپي شوی دی.
له دې سره سره، لا څرګنده نه ده چې د طالبانو دا ګزمه په کومې وسلې نښه شوې ده.
په وروستیو ورځو کې د ازادۍ جبهې په نورستان ولایت کې هم پر طالبانو د برید ادعا کړې وه.
طالبانو تر اوسه په دې اړه په ځانګړې توګه څه ندي ویلي.
