۸صبح، کابل: د طالبانو عامې روغتیا وزارت ویلي چې د دغه وزارت سرپرست نور جلال جلالي د افغانستان لپاره د روغتیا نړیوال سازمان له نوي مشر سره د روغتیايي سیسټم پر پراختیا خبرې اترې کړې دي.
نوموړي وزارت شنبه د زمري پر ۶مه په خواله شبکې اېکس کې لیکلي چې جلالي د افغانستان لپاره د روغتیا نړیوال سازمان له نوي مشر ایډوین سینیزا سلاوډر سره کتلي دي.
د خبرپاڼې په حواله، دواړو لوریو د روغتیايي سیسټم پر پراختیا، لرې پرتو سیمو ته د پاملرنې، له ساري ناروغیو سره پر مبارزې، د پولیو لابراتوار پر فعالیت او روغتیايي سیسټم لپاره د اغېزمنې پالیسۍ جوړولو پر څرنګوالي او همغږۍ خبرې کړې دي.
یاد وزارت د سینیزا سلاوډر له قوله لیکلي چې نوموړي له عامې روغتیا وزارت سره په همغږۍ ټينګار کړی او د افغانستان له روغتیايي سیسټم سره یې د لا همکارۍ او پرمختګ ژمنه کړې ده.
روغتیا نړیوال سازمان تر اوسه په دې اړه څه ویلي نه دي.
له دې وړاندې د طالبانو عامې روغتیا وزارت له سرپرست نور جلال جلالي سره د روغتیا نړیوال سازمان (WHO) د مشر تیدروس ادهانوم ګیبریسیوس د لیدنې عکسونو ته د مخکېنۍ ولسي جرګې ځينو غړو او د ښځو حقونو فعالانو غبرګون ښوولی و او دا لیدنه یې «اخلاقي سقوط» بللې وه.
ګیبریسیوس شنبه د سرطان پر ۳۰مه په خواله شبکې اېکس کې لیکلي و چې د طالبانو عامې روغتیا وزارت له سرپرست سره یې په افغانستان کې د روغتیايي چوپړتیاوو پر وضعیت خبرې کړې دي.
